Home » » Red Theatrical Trailer Launch

Red Theatrical Trailer Launch

 


ఇంట్లో పూజ గది ఉన్నా గుడికే వెళతాం, ఎన్ని ఓ.టి.టి లు ఉన్నా థియేటర్లకే వెళ్ళి సినిమాలు చూస్తాం - రెడ్ థియేట్రికల్ ట్రైలర్ వేడుకలో రామ్ పోతినేని

తన 'ఇస్మార్ట్ శంకర్'తో థియేటర్ల దగ్గర పండగ వాతావరణం తీసుకొచ్చిన రామ్, సంక్రాంతి పండక్కి 'రెడ్' చిత్రం తో థియేటర్లలోకి రానున్నారు.

రామ్ సరసన వేదా పేతురాజ్‌, మాళవికా శర్మ, అమృతా అయ్యర్‌ హీరోయిన్లుగా నటించిన ఈ చిత్రం నుండి ఇటీవల విడుదలైన 'కౌన్ హే అచ్చా‌... కౌన్ హే లుచ్చా' పాట సహా అంతకుముందు విడుదలైన పాటలకు శ్రోతల నుండి అద్భుతమైన స్పందన లభించింది. మెలోడీ బ్రహ్మ మణిశర్మ ఈ చిత్రానికి సంగీతం అందించగా నిర్మాత 'స్రవంతి' రవికిశోర్ ఈ చిత్రాన్ని స్రవంతి మూవీస్ పతాకం పై సంక్రాంతికి విడుదల చేస్తున్నారు.

రెడ్ ట్రైలర్ విడుదల సమావేశం సందర్భంగా నిర్మాత దిల్ రాజు మాట్లాడుతూ, "చాక్లేట్ బాయ్ ఇమేజ్ నుండి ఇస్మార్ట్ శంకర్ లో విశ్వరూపం చూపించి మాస్ ఇమేజ్ కూడా సంపాదించుకున్నాడు రామ్. ఇప్పుడు రెడ్ తో దాన్ని రెండింతలు చేసుకోనున్నాడు. ఆశ్చర్యమేంటంటే చాలా సున్నితంగా, క్లాస్ గా కనిపించే డైరెక్టర్ కిషోర్ తిరుమల కూడా ఈ చిత్రం తో తాను మాస్ చిత్రాలు  రాయగలడని, తీయగలడు అని చూపించుకున్నాడు. ఈ చిత్రంలోని థ్రిల్లింగ్ కథ, సన్నివేశాలు అద్భుతంగా ఉన్నాయి అలాగే హీరో రామ్ పోతినేని డబుల్ రోల్ లో చాలా బాగా చేసాడు. ఖచ్చితంగా హిట్టు కొట్టబోతున్న చిత్రం ఇది. నిర్మాత రవికిశోర్ గారి నిర్ణయాలు, డైరెక్టర్ కిషోర్ తిరుమల కథ విషయంలో తీసుకునే జాగ్రత్తలు ఈ చిత్రంలో కూడా కనిపిస్తాయి, మణిశర్మ సంగీతం గట్టి బలమవుతుంది, అలాగే మంచి టీమ్ ఉంది ఈ చిత్రానికి. ఇస్మార్ట్ శంకర్ తరువాత ఈ పండగకి వస్తున్న రెడ్, రామ్ కి దానికంటే పెద్ద హిట్ అవ్వబోతోంది. పరిశ్రమకి పండగకి పెద్ద హిట్ రామ్ ద్వారా రానున్నందుకు చాలా సంతోషంగా ఉంది.

9  నెలల తరువాత మళ్ళీ అందరికి ఎంటర్టైన్మెంట్ ఇవ్వడానికి మా చిత్ర పరిశ్రమ సిద్దమయ్యింది. ఈ నెలలో విడుదలయ్యే చిత్రాలనుండి మొదలుకుని సంక్రాంతికీ, ఆ తరువాత కూడా విడుదలవ్వడానికి సిద్ధంగా ఉన్న చిత్రాలన్నిటికీ మంచి విజయం దక్కాలి అని, థియేటర్ కి వచ్చే ప్రేక్షకులు అన్ని జాగ్రత్తల మధ్యే  చిత్రాన్ని చూసి ఆనందించాలని కోరుకుంటున్నాం." అని అన్నారు.

నిర్మాత కె.ఎల్. దామోదర్ ప్రసాద్ (దాము) మాట్లాడుతూ "రామ్ పోతినేని మన తెలుగు పరిశ్రమలో ఉన్నవాళ్లందరిలో చాలా ఎనర్జిటిక్ స్టార్ అని నా అభిప్రాయం. ట్రైలర్ చూసాక, పరిశ్రమ మళ్ళీ పుంజుకోడానికి ఇంత ఎనర్జీ అవసరం అనిపిస్తుంది. ప్రేక్షకులని ఇలాంటి పరిస్థితుల మధ్య థియేటర్లకు వచ్చేలా చేయాలంటే చాలా గట్టి కథ కావలి, ఇది ఖచ్చితంగా అలాంటి చిత్రమే. మిత్రులు రవికిశోర్ కి డైరెక్టర్ కిషోర్ తిరుమలకి, రామ్ కి అభినందనలు. రెడ్ చిత్రం సంక్రాంతికి విడుదలై చాలా పెద్ద సక్సెస్ అవుతుందని ఆశిస్తున్నాను." అని అన్నారు.

దర్శకుడు కిషోర్ తిరుమల మాట్లాడుతూ, "10 నెలల్లో కోల్పోయిన ఆనందాల్లో థియేటర్లు కూడా ఉంటాయి. ఈ 10  నెలల విరామానికి ఆనందం పదింతలయ్యి మీకు చేరాలని కోరుకుంటున్నాము. ఈ చిత్రానికి అవకాశమిచ్చినందుకు స్రవంతి రవి కిశోర్ గారికి, రామ్ గారికి ధన్యవాదాలు. అలాగే ఈ చిత్రంలో సహకరించినందుకు మా కెమెరామన్ సమీర్ రెడ్డి గారికి, ఏ.ఎస్. ప్రకాష్ గారికి, మణిశర్మ గారికి, ఎడిటర్ జునైద్ గారికి, హీరోయిన్లు అమృత, మాళవిక, నివేత మరియు ఇతర టీమ్ అందరికి కృతఙ్ఞతలు తెలియజేసుకుంటున్నాను. ఈ చిత్రం అందరికి మంచి సక్సెస్ ని, గుర్తింపుని ఇవ్వాలని కోరుకుంటున్నాను." అన్నారు.

హీరోయిన్ నివేదా పేతురాజ్ మాట్లాడుతూ, "మళ్ళీ థియేటర్లకు రావడం చాలా సంతోషంగా ఉంది. ట్రైలర్ ని ఇలా పెద్ద తెర మీద చూడ్డం చాలా బాగుంది. ఈసారి ఖచ్చితంగా హిట్ కొట్టే చిత్రంతో వస్తున్నామనిపిస్తుంది. ఇస్మార్ట్ శంకర్ చూసిన నాకు రామ్ ఎనర్జీ అర్ధమయిపోయింది, ఈ చిత్రంలో అది ఇంకా డబుల్ అయ్యింది. కిషోర్ తిరుమల గారి నుండి ఇలాంటి మాస్ థ్రిల్లర్ రావడం అందరితో పాటు నాకు ఆశ్చర్యమేసింది, ఆయనలో ఒక ఒక కొత్త రకమైన కోణం ఇది. చిత్ర టీం తో పని చేయడం చాలా సంతోషాన్నిచ్చింది. అన్ని జాగ్రత్తలు తీసుకుంటూ వచ్చి థియేటర్లలో మా చిత్రాన్ని చూసి ఆనందిస్తారని కోరుకుంటున్నాను." అన్నారు.

హీరోయిన్ మాళవిక శర్మ మాట్లాడుతూ, "మా రెడ్ చిత్రం సంక్రాంతికి విడుదలవుతుంది. పూర్తి చిత్రం చూసాక మా అందరికి ఇంకా చాలా నచ్చింది, మీ అందరికి కూడా బాగా నచ్చుతుంది అని ఆశిస్తున్నాము. అందరూ తప్పకుండా చూడండి." అని అన్నారు.

హీరో రామ్ మాట్లాడుతూ, "ఇంట్లో పూజ గది ఉన్నా గుడికే వెళతాం, వంట చేసుకోగలిగినా హోటల్ కి వెళతాం, అలాగే ఎన్ని ఓ.టి.టి వేదికలున్నా థియేటర్లకే వచ్చి సినిమాలు చూస్తాం, ఆ అనుభూతే పూర్తిగా వేరుగా ఉంటుంది. ఇలా థియేటర్ లో మళ్ళీ ట్రైలర్ ని చూడడం చాలా కొత్తగా అనిపిస్తుంది. ఇన్ని రోజుల విరామం, వాయిదాలు, కష్టాలు అన్నీ మర్చిపోతాం థియేటర్లలో చిత్రం చూస్తూ ఒక కొత్త ప్రపంచంలోకి వెళ్ళిపోతాం. అలాంటి అనుభూతి అందరికి ఇవ్వాలనే చాలా గట్టిగా నిర్ణయించుకున్నారు స్రవంతి రవి కిషోర్ గారు. కిషోర్ తిరుమల, సమీర్ రెడ్డి గారి లాంటి ప్రతిభ ఉన్న టెక్నీషియన్స్ కి ఒక కొత్త జానర్ ఇస్తే ఎలా తీస్తారో అని నాకొచ్చిన సందేహాన్ని పూర్తిగా మార్చేసి వేరే లెవెల్ కంటెంట్ ని విజువల్స్ ని ఇచ్చారు. ఇందులో ఉన్న పోలీస్ రోల్ కి నివేదా పేరురాజ్ సరిగ్గా సరిపోతుంది అని అందరికి అనిపించినట్టే తాను చాలా బాగా చేసింది. మాళవిక శర్మ, అమృతా అయ్యర్ లు పాత్రకి తగ్గట్టుగా అద్భుతంగా నటించారు. అలాగే ప్రేక్షకులందరూ జాగ్రత్తగా ఉంటూనే థియేటర్లకు రావాలని కోరుతున్నాము ఎందుకంటే జాగ్రత్త - జాగ్రత్తే, ఎంటర్టైన్మెంట్ - ఎంటెర్టైన్మెంటే." అని అన్నారు.

న‌టీన‌టులు

రామ్‌, నివేదా పేతురాజ్‌, మాళవికా శర్మ, అమృతా అయ్యర్‌, నాజ‌ర్ తదితరులు 

సాంకేతిక నిపుణులు

సంస్థ‌: శ‌్రీ స్ర‌వంతి మూవీస్‌, సంగీతం: మణిశర్మ, ఛాయాగ్రహణం: సమీర్‌ రెడ్డి, ఆర్ట్: ఎ.ఎస్‌.ప్రకాష్‌, ఫైట్స్: పీటర్‌ హెయిన్స్, ఎడిటింగ్‌: జునైద్‌, సమర్పణ: కృష్ణ పోతినేని, నిర్మాత: 'స్రవంతి' రవికిశోర్‌, దర్శకత్వం: కిశోర్‌ తిరుమల.


Share this article :
 
Copyright © 2015. TeluguCinemas.in | Telugu Cinemas - All Rights Reserved
Thank You Visit Again