ఈ పిక్చర్ డర్టీగా ఉంటుందని టైటిల్‌లో చెప్పి మరీ ఏక్తాకపూర్ నిర్భయంగా విడుదల చేసిన చిత్రం ‘డర్టీ పిక్చర్’. కానీ ఈ బొమ్మ ప్రేక్షకులను విపరీతంగా ఆకట్టుకుంది. అప్పటివరకు హోమ్లీగా కనిపించిన విద్యాబాలన్ ఈ చిత్రంలో హద్దులు దాటారు. కథకు న్యాయం చేయాలనే ఒక్క విషయాన్ని మాత్రమే ఆమె దృష్టిలో పెట్టుకుని, అంగాంగ ప్రదర్శనకు అడ్డు చెప్పలేదు. శృంగార సన్నివేశాల్లో ఆమె రెచ్చిపోయినా ప్రేక్షకులు పెదవి విరవలేదు. సరికదా.. ‘భేష్.. బాలన్ బాగా చేసింది’ అని కితాబులిచ్చేశారు. ఈ చిత్రాన్ని తెలుగు, తమిళ భాషల్లో అనువదించి విడుదల చేశారు. కానీ ప్రేక్షకులకు పెద్దగా రీచ్ కాలేదు. దాంతో ‘డర్టీ పిక్చర్’ని ఈ రెండు భాషల్లోనూ పునర్నిర్మించడానికి నిర్మాత సన్నాహాలు చేస్తున్నారని సమాచారం. విద్యాబాలన్‌లా హాట్‌గా కనిపించి, ప్రేక్షకుల నుంచి విమర్శలు కాకుండా శభాష్ అనిపించుకోదగ్గ సత్తా దక్షిణాదిన ఏ తారకు ఉంది? అని ఆలోచించారట. వారి దృష్టిలో అనుష్క పడ్డారని వినికిడి. సదరు నిర్మాత దృష్టిలో అనుష్క పడటానికి ‘అరుంధతి, వేదం’ చిత్రాలు ఒక కారణం అయ్యుండొచ్చేమో. ‘అరుంధతి’లో పవర్‌ఫుల్ బొమ్మాళిగా, ‘వేదం’లో వేశ్యగా... భిన్న కోణాలున్న ఈ పాత్రలకు ఆహార్యం, అభినయం పరంగా అనుష్క కనబర్చిన వ్యత్యాసాన్ని ప్రత్యేకంగా చెప్పక్కర్లేదు. పైగా తెలుగు, తమిళ భాషల్లో ఈ బ్యూటీకి మంచి క్రేజ్ ఉంది కాబట్టి... దక్షిణాది ‘డర్టీ పిక్చర్’కి అనుష్కే కరెక్ట్ అని కూడా నిర్మాత ఫిక్స్ అయ్యారట. త్వరలో ఈ రీమేక్ గురించి అనుష్కను సంప్రదించాలనుకుంటున్నారట. |
source sakshi
